თბილისის საქალაქო სასამართლოს ადმინისტრაციულ საქმეთა კოლეგიის 2012 წლის 9 ივლისის გადაწყვეტილებით, ნაწილობრივ დაკმაყოფილდა მარინა ქისიშვილის სარჩელი, მოპასუხეების ქ. თბილისის ვაკე-საბურთალოს რაიონის გამგეობის და ქ. თბილისის მერიის მიმართ. ინდივიდუალური ადმინისტრაციულ-სამართლებრივი აქტების ბათილად ცნობისა და ახალი აქტის გამოცემის დავალდებულების თაობაზე. 

საქმის მასალების მიხედვით, მოსარჩელემ ქ. თბილისის ვაკე-საბურთალოს რაიონის გამგეობას განცხადებით მიმართა და მოითხოვა მისთვის, როგორც ერთადერთი კანონიერი მოსარგებლისათვის ამავე რაიონში მდებარე ერთ-ერთი საცხოვრებელი ბინის უსასყიდლოდ საკუთრებაში გადაცემა. მოსარჩელის მითითებით სადავო ქონებაზე სხვა პირს ან პირებს პრეტენზია არ გააჩნიათ. გამგეობის გადაწყვეტილებით, უარი ეთქვა მოსარჩელეს განცხადების დაკმაყოფილებაზე, იმ საფუძველით, რომ წარდგენილი დოკუმენტები არ ადასტურებდა არაპრივატიზებული, საცხოვრებელ და არასაცხოვრებელ ფართებზე მარინა ქისიშვილის კანონიერი სარგებლობის უფლების ფაქტს. აღნიშნული ინდივიდუალური ადმინისტრაციულ-სამართლებრივი აქტი მოსარჩელემ მიიჩნია უკანონოდ და გაასაჩივრა ქ. თბილისის მერიაში. 2012 წლის განკარგულებით მოსარჩელეს კვლავ უარი ეთქვა  მოთხოვნის დაკმაყოფილებაზე. 

სასამართლო გაეცნო საქმის მასალებს, შეამოწმა სარჩელის საფუძვლიანობა, შეაფასა წარმოდგენილი მტკიცებულებები და მიიჩნია, რომ სარჩელი ნაწილობრივ უნდა დაკმაყოფილდეს, რადგან მარინა ქისიშვილს სადავო ბინის უსასყიდლოდ საკუთრებაში გადაცემაზე უარი ეთქვა საქმისათვის არსებითი მნიშვნელობის გარემოებების გამოკვლევისა და შეფასების გარეშე. სასამართლოს გადაწყვეტილებით ქ. თბილისის ვაკე-საბურთალოს რაიონის გამგეობას დაევალა საკითხის ხელახალი შესწავლა და შემდგომ შესაბამისი ადმინისტრაციულ-სამართლებრივი აქტის გამოცემა. 

სასამართლოს გადაწყვეტილება შეიძლება გასაჩივრდეს თბილისის სააპელაციო სასამართლოში დასაბუთებული გადაწყვეტილების მხარისათვის  გადაცემიდან 14 დღის ვადაში.
internet.ge