აჭარის მთავრობის მეთაურმა ლევან ვარშალომიძემ, ეკონომიკისა და ფინანსთა მინისტრთან, ვაჟა ბოლქვაძესთან ერთად, ბათუმის ინდუსტრიული ზონა მოინახულა. ხელისუფლების წარმომადგენლები დაგეგმარების პროექტს გაეცნენ, რომლის თანახმადაც, 92,5 ჰექტარ მიწაზე სხვადასხვა ბიზნეს-დაწესებულებები განთავსდება.

ვაჟა ბოლქვაძის განცხადებით, ინდუსტრიულ ზონაში ყველა პირობაა შექმნილი საიმისოდ, რომ პოტენციურმა ინვესტორებმა შეღავათიან ფასად შეიძინონ მიწის ნაკვეთი, შექმნან საწარმოები და დაასაქმონ ადგილობრივი მაცხოვრებლები.

პროექტის ფარგლებში, მოცემულ ტერიტორიაზე უკვე დასრულდა საკანალიზაციო და წყლის სისტემის გაყვანა, ასევე, გაზიფიცირების სამუშაოები. ამჟამად მიმდინარეობს გზებზე ბეტონის საფარის დაგება. „აპსნიპრესის“ ცნობით, ტერიტორიის 60% უკვე ათვისებულია ადგილობრივი და უცხოელი ინვესტორების მიერ.

Internet.ge