განათლებისა და მეცნიერების სამინისტროს ინფორმაციით, შოთა რუსთაველის ეროვნული სამეცნიერო ფონდის ვებ-გვერდზე www.rustaveli.org.ge მონაწილეობის მსურველთა რეგისტრაცია დღეს, ხოლო დარეგისტრირებული პროექტების ფონდში წარმოდგენა 16 აგვისტოს დასრულდება.

კონკურსში მონაწილეობის მიღება შეუძლიათ საქართველოსა და საზღვარგარეთის ქვეყნების ზოგადსაგანმანათლებლო დაწესებულებების მოსწავლეებს, როგორც ინდივიდუალურად, ასევე, ჯგუფურად. წარმოდგენილი პროექტი უნდა მოიცავდეს გამოგონების როგორც ტექსტუალურ აღწერილობას, ასევე, შესაბამის მაკეტს, მოდელს ან ნახაზებს.

პრეზიდენტის მიერ ინიცირებულ მოსწავლე-გამომგონებელთა საერთაშორისო კონკურსს ”ლეონარდო და ვინჩის” შოთა რუსთაველის ეროვნული სამეცნიერო ფონდი 2011 წლიდან ახორციელებს. კონკურსის მიზანია შემოქმედებითი აზროვნების, გამომგონებლის ნიჭით დაჯილდოებული მოზარდების გამოვლენა-წახალისება და მათი ინოვაციური და პრაქტიკული უნარ-ჩვევების განვითარების ხელშეწყობა.

კონკურსის გამარჯვებულებს კომპეტენტური ჟიური სექტემბრის ბოლოს სპეციალურად მოწყობილ გამოფენაზე გამოავლენს. კონკურსში გამარჯვებული პროექტების ავტორები დაჯილდოვდებიან მედლებითა და ფულადი პრემიებით. I ადგილზე გასული პროექტის წარმომდგენს 5000 ლარი, II ადგილს - 3 000 ლარი, ხოლო III ადგილს - 2 000 ლარი გადაეცემა. გრანპრის მფლობელი პროექტის ავტორი ან ავტორები კი სასწავლო შემეცნებითი ტურით საზღვარგარეთ გაემგზავრებიან.

Internet.ge