ამერიკის პრეზიდენტმა საიდუმლო განკარგულება გასცა, რომლის მიხედვითაც აშშ-ის ცენტრალური სადაზვერვო სააგენტო სირიელ მეამბოხეებს ბაშარ ასადის ჩამოგდებაში დაეხმარება. ამის შესახებ სააგენტო „როიტერი“ იუწყება.

დოკუმენტის ხელმოწერის ზუსტი თარიღი არ მჟღავნდება, თუმცა ცნობილია, რომ იგი მიმდინარე წელს გაფორმდა. განკარგულებაში ნათქვამია, რომ ცენტრალურ სადაზვერვო სააგენტოსა და სხვა ამერიკულ სპეცსამსახურებს უფლება ეძლევათ, დახმარება აღმოუჩინონ ასადის რეჟიმის მოწინააღმდეგეებს, რამაც შესაძლოა სირიის პრეზიდენტის ჩამოგდება გამოიწვიოს.

თეთრი სახლის წარმომადგენლებმა აღნიშნულთან დაკავშირებით BBC-სთვის კომენტარის მიცემაზე უარი განაცხადეს.

გუშინ აშშ-ს სახელმწიფო დეპარტამენტმა განაცხადა, რომ ამერიკის ხელისუფლებამ სირიელი მეამბოხეების დასახმარებლად 25 მილიონი დოლარი გადადო, რომელიც კავშირის საშუალებების მიწოდებისთვის გამოიყენება.

სირიაში ანტისახელისუფლებო გამოსვლები და შეტაკებები 2011 წლის მარტში დაიწყო. გაეროს მონაცემებით, მას შემდეგ ქვეყანაში 16 ათასი ადამიანი დაიღუპა.

internet.ge