საქართველოს რეგიონული განვითარებისა და ინფრასტრუქტურის მინისტრმა, რამაზ ნიკოლაიშვილმა და აზერბაიჯანის ტრანსპორტის სამინისტროს ღია სააქციო საზოგადოება "აზერ როუდ სერვისი"-ს თავმჯდომარემ, ჯავიდ გურბანოვმა, დღეს, "მარაბდა-თეთრიწყარო-წალკა-ახალქალაქი-კარწახის სარკინიგზო ხაზის" მშენებლობა-რეაბილიტაციის პროექტის ფარგლებში მიმდინარე სამუშაოები დაათვალიერეს.

მინისტრი ასევე, ახალქალაქის სარკინიგზო სადგურის საძირკვლის აფეთქებით სამუშაოებს დაესწრო და პროექტზე დასაქმებულ ადამიანებს შეხვდა.

"მარაბდა-თეთრიწყარო-წალკა-ახალქალაქი-კარწახის სარკინიგზო ხაზის" მშენებლობა-რეაბილიტაციის პროექტი სამ ეტაპად ხორციელდება. ამჟამად უკვე დასრულდა მარაბდა-თეთრიწყაროს 29 კილომეტრიან მონაკვეთზე მიმდინარე სარეაბილიტაციო სამუშაოები, რეაბილიტაცია ჩაუტარდა ცხრა ძმის სარკინიგზო სადგურს, შენდება კირბულახის სარკინიგზო ხიდი, დასასრულს უახლოვდება კარწახის სარკინიგზო სადგურის მშენებლობა.

ასევე, უწყვეტ რეჟიმში მიმდინარეობს ახალქალაქი-კარწახის მონაკვეთზე 25 კმ-იანი სრულიად ახალი სარკინიგზო ხაზის მშენებლობა. სწორედ აღნიშნული სამუშაოების ფარგლებში ჩატარდა ახალქალაქის რკინიგზის სადგურის საძირკვლის აფეთქებაც. პროექტის დასრულების შემდეგ ახალი რკინიგზის ხაზი ყველა პარამეტრით გაუთანაბრდება საერთაშორისო სტანდარტებს. ახალქალაქის სარკინიგზო სადგურის ექსპლუატაციაში შესვლის შემდეგ, მხოლოდ აღნიშნულ ობიექტზე, 550 ადამიანი დასაქმდება.

რეგიონალური განვითარებისა და ინფრასტრუქტურის სამინისტროს ინფორმაციით, "მარაბდა-თეთრიწყარო-წალკა-ახალქალაქი-კარწახის სარკინიგზო ხაზის" პროექტზე პირდაპირ და ირიბად 4000-მდე ადამიანი დასაქმდება, რომელთა უმრავლესობა ადგილობრივი მოსახლეობაა. 2012 წელს, რეგიონული განვითარებისა და ინფრასტრუქტურის სამინისტროს კოორდინირებით მიმდინარე პროექტებზე, მთელი საქართველოს მასშტაბით, 50 ათასამდე ადამიანი დასაქმდება. 

"მარაბდა-თეთრწყარო-წალკა-ახალქალაქი-კარწახის სარკინიგზო ხაზის" რეაბილიტაცია-მშენებლობის პროექტი "ბაქო-თბილისი-ყარსის ახალი სარკინიგზო ხაზის" მშენებლობის შესახებ საქართველოს, აზერბაიჯანსა და თურქეთს შორის გაფორმებული საერთაშორისო შეთანხმების ფარგლებში ხორციელდება და საქართველო-აზერბაიჯანი-თურქეთის, როგორც ინფრასტრუქტურული ასევე რეგიონული თვალსაზრისით უმნიშვნელოვანეს პროექტს წარმოადგენს.

ახალი სარკინიგზო ხაზი ხელს შეუწყობს ტვირთბრუნვის გაზრდას და აზიიდან ევროპაში ტვირთების სწრაფად ტრანსპორტირებას, ასევე სტაბილური სამუშაო ადგილების შექმნას და ადგილობრივი მოსახლეობის დასაქმებას. 

Internet.ge