მოსკოვი მადლიერია ქართველი მაშველების, რომლებმაც დახმარება გაუწიეს რუს ალპინისტებს. ამის შესახებ „იტარ-ტასს“ რუსეთის საგარეო საქმეთა სამინისტროში განუცხადეს.

„საქართველოს სამაშველო სამსახურებმა დაასრულეს ვერტმფრენით ევაკუაციის ოპერაცია 4 რუსი ალპინისტისა, რომლებიც სვანეთის რთულადმისადგომ, მთიან ტერიტორიაზე საგანგებო სიტუაციაში აღმოჩნდნენ“ - განაცხადეს სამინისტროში და დასძინეს, რომ ქვების ცვენისას დაშავებულ რუსეთის მოქალაქეს სამედიცინო დახმარებაც აღმოუჩინეს.

„მადლიერებით აღვნიშნავთ ქართველი მაშველების ეფექტურ ქმედებას“  - განაცხადეს საგარეო უწყებაში.

შეგახსენებთ, რომ ორდღიანი სამძებრო სამუშაოების შემდეგ შინაგან საქმეთა სამინისტროს საგანგებო სიტუაციების მართვის დეპარტამენტის თანამშრომლებმა სვანეთში, თეთნულდის მთაზე მყოფი 4 რუსი ალპინისტი გამოიყვანეს.

შსს-ს ინფორმაციით, სამაშველო ოპერაციებში შინაგან საქმეთა სამინისტროს 8-კაციანი ჯგუფი მონაწილეობდა. ალპინისტების პოვნას უამინდობა უშლიდა ხელს. მათი გამოყვანა გუშინ, ვერტმფრენის მეშვეობით მოხერხდა. ტურისტების ჯანმრთელობის მდგომარეობა დამაკმაყოფილებელია. ერთ-ერთი ალპინისტი, რომელმაც ფეხი დაიზიანა საავადმყოფოშია გადაყვანილი.

internet.ge