ექსპერტთა კლუბის წარმომადგენელი ირაკლი ცქიტიშვილი ამბობს, რომ მედიაში გასული ინფორმაცია, სერიოზულ ანალიზს საჭიროებს. საქმე ეხება „ინტერნეტ.ჯი“-ს მიერ გამოქვეყნებულ მასალას, სადაც საუბარია, რომ  რუსეთის სამხრეთის სამხედრო ოლქის 58-ე არმიის სამხედრო მოსამსახურეები ოკუპირებული ცხინვალის ტერიტორიაზე დაისვენებენ.

ცქიტიშვილის ვარაუდით, აღნიშნული მოპატიჟება, მითუმეტეს საქართველოში დაგეგმილი არჩევნების წინ, დამაფიქრებელია და ამყარებს ექსპერტთა გარკვეული წრის მოსაზრებას, რომ ოკუპირებულ რეგიონებში რუსეთის მიერ ფართომასშტაბიანი სწავლებების ჩატარება, ჩრდილოელი მეზობლის მიერ  საქართველოს წინააღმდეგ მორიგი აგრესიის მზადებას უკავშირდებოდეს.

"ხომ არ არის რუსი სამხედროების ცხინვალის რეგიონში დასვენების ორგანიზება სავარაუდო საომარ მოქმედებებთან კავშირში, ამ ეტაპზე რთული სათქმელია. ფაქტია, რომ ამ შემთხვევაში რუსეთს ოკუპირებულ ტერიტორიაზე დამატებით უკვე ეყოლება სამხედროების გარკვეული კონტინგენტი, რაც დამატებით ყურადღებას მოითხოვს ჩვენი ქვეყნის შესაბამისი სტრუქტურების მხრიდან", – აცხადებს "ესქპერტთა კლუბის წარმომადგენელი ირაკლი ცქიტიშვილი.

58-ე არმიის ცხინვალში მიპატიჟების ორგანიზატორი ადგილობრივი დაჭრილთა ფონდია, რომელიც თვლის, რომ 2008 წლის აგვისტოს ომის მონაწილე სამხედროების მიმართ მადლიერებას ამ ფორმით გამოხატავენ.

რამდენი სამხედრო მოსამსახურე შევა ცხინვალის რეგიონის ტერიტორიაზე, უცნობია. უცნობია ისიც, რამდენ ხანს გასტანს მათი დასვენება.

ცნობილია მხოლოდ ის, რომ 58- ე არმიის შემადგენლობა ე.წ. სამხრეთ ოსეთში 26 აგვისტოს შევა, როცა სეპარატისტები რუსეთის მიერ აღიარებას ზეიმობენ.

internet.ge