კოალიცია "ქართული ოცნების" საგარეჯოს მაჟორიტარი დეპუტატობის კანდიდატი თინათინ ხიდაშელი  საგარეჯოს პოლიციაში დაიკითხა.

„რესპუბიკური პარტიის“ პრესსამსახურის ცნობით, ხიდაშელი 17 აგვისტოს  სოფელ მუღალოსა და ქეშალის მოსახლეობასთან შეხვედრის დროს მომხდარი ინცინდენტის შესახებ დაჰკითხეს.

თინათინ ხიდაშელის განცხადებით ის საგარეჯოს პოლიციას  ვიდეომასალას წარუდგენს სადაც ინცინდენტის ამსახველი კადრებია და იმედოვნებს, რომ საქმისწარმოება მომხდარი ფაქტის შესახებ აუცილებლად  დაიწყება.

შეგახსენებთ, რომ ხიდაშელი გამგებელს წინასაარჩევნო კამპანიაში ხელის შეშლას ედავება.

თინა ხიდაშელი ირწმუნება, რომ 17 აგვისტოს, როცა ის შეხვედრებს სოფელ მუღალოსა და ქეშალის მოსახლეობასთან მართავდა,  ადგილობრივი ხელისუფლების წარმომადგენლები მივიდნენ, ჩხუბი დაიწყეს და შეხვედრის ჩაშლა სცადეს.

„ისინი განსაკუთრებული აგრესიით გამოირჩეოდნენ "ინფო 9"-ის თვითმარქვია წარმომადგენლის მიმართ, რომელიც "ინფო 9"-ის ნამდვილ წარმომადგენლად მიიჩნიეს და სიტყვიერი და ფიზიკური შეურაცხყოფა მიაყენეს.

საგარეჯოს მაჟორიტარი დეპუტატობის კანდიდატის თინათინ ხიდაშელის საარჩევნო შტაბს აქვს ვიდეო მასალა, სადაც კარგად ჩანს ჩხუბის ინიციატორები და აქტიური მონაწილეები: სოფელ დუზაგრამის გამგებელი მუხტარ ისმაილოვი, სოფელ ლამბალოს გამგებელი ალახიარ აბდულაევი, სოფელ თულარის დეპუტატი საკრებულოში ვექილ ვექილოვი, სოფელ ქეშალოს გამგებლის თავთუხ კაჭიევის დისშვილი და გამგეობის თანამშრომელი ადრე ნასამართლევი ილგარ გაჯიევი, რომელიც ვიდეოკამერის დამტვრევასაც ცდილობდა.

ამ ინციდენტის თაობაზე ინფორმაცია რეაგირებისთვის გადაეცა უწყებათაშორის კომისიას და საერთაშორისო დამკვირვებლებს“,- ნათქვამია განცხადებაში.

internet.ge