საქართველოს პრეზიდენტი  მიხეილ სააკაშვილი  დავით აღმაშენებლის სახელობის საერთაშორისო აეროპორტში ასაფრენი ბილიკის პრეზენტაციას დაესწრო.

მიხეილ სააკაშვილის განცხადებით, აღნიშნული აეროპორტიდან რეისები მსოფლიოს თითქმის ყველა მიმართულებით შესრულდება.

ამასთან, როგორც პრეზიდენტმა აღნიშნა, აღმაშენებლის სახელობის საერთაშორისო აეროპორტი შიდა კონკურენციასაც გაზრდის.

„ეს აეროპორტი მოსახლეობისთვის ხელმისაწვდომი იქნება, თბილისში კი ფასებმა აუცილებლად უნდა დაიწიოს. მტრის გულის გასახეთქად და მოყვარის გასახარებლად ანალოგიური აეროპორტების მშენებლომა მესტიაში და ფოთშიც იგეგმება“,- განაცხადა მიხეილ სააკაშვილმა.

მისი თქმით, ეს სწორედ ის აეროპორტია, რომელიც 2008 წლის რუსული ინტერვენციის დროს რუსმა სამხედროებმა დაბომბეს.

„ამ აეროპორტის მშენებლობისას თითქმის ყოველდღე პოულობდნენ რუსების მიერ ჩამოგდებულ ბომბებს, მაგრამ ჩვენ წინ მივიწევთ და ვანვითარებთ ტურიზმს, აეროპორტების არსებობა კი ამის წინაპირობაა“,- განმარტა მიხეილ სააკაშვილმა.

დავით აღმაშენებლის სახელობის  საერთაშორისო აეროპორტის ასაფრენი ბილიკის სიგძე 2 კილომეტრი და 600 მეტრია.

შეგახსენებთ, რომ 27 სეტქემბრიდან აეროპორტი ოფიციალურად გაიხსნება და სამოქალაქო რეისებს უმასპინძლებს.

აღნიშნულ აეროპორტს A კატეგორიის წოდება მიენიჭება.

internet.ge