Empire-ის ცნობით, ლიბანური წარმომავლობის მსახიობი სალმა ჰაიეკი (Salma Hayek) პროდიუსერ კლარკ პეტერსონთან (Clark Peterson) და რონ სენოვსკისთან (Ron Senkowski) ერთად ჰალილ ჯებრანის "წინასწარმეტყველის" ეკრანიზაციას აპირებს.

ლიბანელი მწერლის ყველაზე ცნობილი წიგნი პირველად 1923 წელს გამოვიდა და მსოფლიო ბესტსელერი გახდა. ეს დიდი ფილოსოფიური პოემაა, რომელშიც წინასწარმეტყველი ალ-ნაბი მოგზაურობას აპირებს, მაგრამ ნაპირისკენ გზად ადამიანების კითხვებს პასუხობს სიცოცხლეზე, სამყაროსა და უამრავ სხვა საკითხზე.

სურათი რამდენიმე რეჟისორის ანიმაციური ფილმი-ანთოლოგია იქნება. თითოული ერთ ისტორიას გადაიღებს, ხოლო მათი დამაკავშირებელი ძირითადი სიუჟეტი როჯერ ალერსს (Roger Allers), დისნეისეული "მეფე ლომის" (The Lion King) მიანდეს.

პროექტის მონაწილეთა შორის არიან "პერსეპოლისის" ავტორი მარჯან სატრაპი (Marjane Satrapi) და "კელსის საიდუმლოს" (The Secret Of Kells) ავტორი ტომ მური (Tomm Moore).

ჯებრან ჰალილ ჯებრანი (1883-1931) - ლიბანელი და ამერიკელი ფილოსოფოსი, მხატვარი, პოეტი და მწერალია, 1895 წელს ნათესავებთან ერთად აშშ-ში გადასახლდა.

Internet.ge