პოპ-არტის დამფუძნებლის, ენდი უორჰოლის ნამუშევარი „ორმაგი ელვისი“ ნიუ-იორკის „სოტბის“ აუქციონზე 37 მლნ დოლარად გაიყიდა. ამის შესახებ „Associated Press“-ი იტყობინება.

უორჰოლის სურათზე როკის ლეგენდა კოვბოის ფორმაშია გამოწყობილი. აუქციონის ორგანიზატორები პრესლის პორტრეტის სანაცვლოდ 30-დან 50 მილიონ დოლარამდე შემოსავალს ვარაუდობდნენ.

პოპ-არტის მეორე წარმომადგენლის, როი ლიხტენშტეინის, კლასიკა „მძინარე გოგონა“ ამავე აუქციონზე 44,8 მილიონ დოლარად გაიყიდა. ეს არის რეკორდული ფასი, რაც კი ლიხტენშტეინის ნამუშევრებისთვის გადაუხდიათ.

„სოტბის“ აუქციონზე ჩინელი მხატვარ-დისიდენტის აი უეიუეის ქმნილებაც გამოიტანეს. მის ნახატში „მზესუმზირის მარცვლები“ 782 500 დოლარი გადაიხადეს.

ცნობილი ნამუშევრების მყიდველთა ვინაობა უცნობია.

Internet.ge