13 ივნისს, მსოფლიო ტურნეს ფარგლებში, თბილისს გერმანიაში მოღვაწე ჯგუფი Flying Steps  ეწვევა.

ორდღიანი ტურნეს ფარგლებში გერმანული ჯგუფი რუსთაველის თეატრში Red Bull Flying Bach შოუს გამართავს. აღნიშნული პროექტი Red Bull Flying Bach კლასიკური მუსიკისა და ბრეიქდანსის სინთეზია. კონკრეტულად კი ეს არის იოჰან სებასტიან ბახის ცნობილი ნაწარმოების საცეკვაო ინტერპრეტაცია, რომელსაც ბრეიქდანსის მსოფლიო ვარსკვლავები – Flying Steps შეასრულებს.

2012 წლის პირველი წარმოდგენა 3 მაისს, ხორვატიის ქალაქ პულაში გაიმართა, საქართველო კი მეორე ქვეყანაა მსოფლიო ტურნეს რუკაზე (ტურნეს ფარგლებში ასევე ჯგუფი ეწვევა: ნორვეგიას, ლიბანს, კატარს, არაბეთის გაერთიანებულ საემიროებს, იტალიას, შვედეთს, უკრაინას, ჩეხეთს, იაპონიას, შვეიცარიასა და რუსეთს).

Red Bull Flying Bach-ის პირველი ევროპული ტურნე 2011 წელს გაიმართა; პროექტის უნიკალურმა კონცეფციამ გააოცა და მოხიბლა აუდიტორია და კრიტიკოსები მთელი კონტინენტის მასშტაბით, რის შედეგადაც მსოფლიო ტურნე კვლავ დაიგეგმა.

მსოფლიოს ოთხგზის ჩემპიონი, ჯგუფი Flying Steps და ბერლინის ოპერის სამხატვრო ხელმძღვანელი კრისტოფ ჰაგელი, მაყურებელს როიალის, ჩემბალოს, ელექტრონული ბითების, პროექციის, შინაარსიანი სიუჟეტისა და  მსოფლიოს რვა საუკეთესო მოცეკვავის მიერ შესრულებული  უნიკალური ქორეოგრაფიის სინთეზს სთავაზობენ.

internet.ge