საპროდიუსერო კომპანია „იბერია ფიქჩერზ“–მა  2011 წლის დეკემბერში გამოაცხადა თბილისის თემატიკასთან დაკავშირებული  სცენარების კონკურსი მოკლემეტრაჟიანი მხატვრული ფილმებისთვის.

კონკურსში მონაწილეობა მიიღო 40–მდე რეჟისორმა. 50–მდე სცენარიდან საბოლოოდ პროექტისთვის 12 სცენარი შეირჩა. 

პროექტის სახელწოდებაა „თბილისი, ჩემი ქალაქი“, (პროდიუსერები: ქეთევან გალდავაძე, დავით აგიაშვილი) რომლის ფარგლებშიც შეიქმნება 12 მოკლემეტრაჟიანი მხატვრული ფილმი თბილისის თემატიკაზე. 
ეს იქნება 12 ერთმანეთისგან განსხვავებული და დამოუკიდებელი ისტორია. თორმეტი  სხვადასხვა თაობის რეჟისორის ხედვა თბილისზე. აღნიშნულ ფილმში  თბილისი წარმოჩნდება, როგორც დასავლური კულტურის მატარებელი ქალაქი და იმავდროულად ნაჩვენები იქნება მისი თვითმყოფადობა. 

პროექტში მონაწილეობას მიიღებენ საქართველოში და უცხოეთში მოღვაწე ქართველი რეჟისორები:  თამარ შავგულიძე, ლევან თუთბერიძე,  თორნიკე ბზიავა, გიორგი ბარაბაძე,   დიმიტრი მამულია,   ლევან ღლონტი,  ირაკლი ჩხიკვაძე,  ნიკა აგიაშვილი, ალექსანდრე ქვირია და ა.შ.

6 მოკლემატრაჟიანი მხატვრული ფილმის გადაღება უკვე დასრულებულია.

აღნიშნული რეჟისორების მიერ გადაღებული მოკლემეტრაჟიანი ფილმები, საბოლოოდ ერთ სრულმეტრაჟიან ფილმად შეიკვრება, სახელწოდებით „თბილისი, ჩემი ქალაქი“. 

როგორც  Deadline იუწყება, ფილმში ცნობილი ამერიკელი მსახიობები: რონ პერლმანი, სარა დიუმონტი, მალკოლმ მაკდაუელი და ჯორჯ ფინი მიიღებენ მონაწილეობას. 

რონ პერლმანი ამერიკელი მოტოციკლეტისტის როლს ითამაშებს, რომელიც თბილისში ქალის, სახელად Freedom (თავისუფლება), თანხლებით მოგზაურობს. პერლმანის მეწყვილე ე.წ. შორთფილმში  სარა დიუმონტი იქნება.

ფილმი გათვლილია, როგორც საქართველოს, ასევე ევროპისა და ამერიკის ბაზარზე. გასაღების ძირითადი არხები იქნება: კინოთეატრი, ტელევიზია და DVD გაქირავება.

დაწყებულია მოლაპარაკებები რამდენიმე  ევროპულ სატელევიზიო არხთან. მიმდინარეობს მოლაპარაკება ამერიკულ საკაბელო ტელეარხებთან, კინოგაქირავების კომპანიებთან („ბლოგბასტერის“, „რედ ბოქსის“ და  „ნეტ ფლიქსის“ დისტრიბუტორებთან).

internet.ge