საქართველოს სტატისტიკის ეროვნული დეპარტამენტის ოფიციალურად დეკლარირებული მონაცემებით, 2012 წლის II კვარტალში საწარმოთა მთლიანმა ბრუნვამ 9.6, ხოლო პროდუქციის მთლიანმა გამოშვებამ – 5.2 მილიარდი ლარი შეადგინა. მთლიანი ბრუნვა საწარმოს ზომის მიხედვით შემდეგნაირად განაწილდა: მსხვილი ბიზნესი – 82.9 პროცენტი, საშუალო ბიზნესი – 7.1 პროცენტი,  მცირე ბიზნესი – 10.0 პროცენტი.

საწარმოთა მიერ განხორციელებულმა საქონლისა და მომსახურების მთლიანმა ყიდვებმა კვარტალის განმავლობაში 7.5, ხოლო გადასაყიდად განკუთვნილი საქონლისა და მომსახურების ყიდვებმა - 4.8 მილიარდი ლარი შეადგინა.

რაც შეეხება საწარმოთა მიერ განხორციელებულ მთლიან ინვესტიციებს, ფიქსირებულ აქტივებში 180,0 მილიონი ლარი შეადგინა.

საქსტატის მიერ გამოქვეყნებულ მონაცემებში ასევე აღნიშნულია საწარმოებში დასაქმებულთა მთლიანი რაოდენობა, რამაც 503.1 ათასი კაცი შეადგინა, რომელთაგან 38,8 პროცენტი ქალია, ხოლო 61,2 პროცენტი - კაცი.

Internet.ge