ევროპაში რიგით მეორე უმსხვილესი ენერგოკომპანია RWE, შესაძლოა, Nabucco-ს პროექტს გამოეთიშოს. კომპანიის ხელმძღვანელები აპირებენ, გადახედონ სტრატეგიულ მოთხოვნებს პროექტში მონაწილეობასთან დაკავშირებით.

როგორც RWE-ს პრეს-სამსახურში აცხადებენ, გაზსადენის პროექტის დატოვებასთან დაკავშირებით, ჯერ არანაირი გადაწყვეტილება არ მიუღიათ. თუმცა ანალიტიკოსები არ გამორიცხავენ Nabucco-დან მათი გამოთიშვის შესაძლებლობას.

„ამ დრომდე დარწმუნებული ვართ, რომ Nabucco-ს თავდაპირველი პროექტი საუკეთესო გადაწყვეტილება იყო ყველა დაინტერესებული მხარისთვის, თუმცა გარემოებების შეცვლისა და ახალი გაზსადენის პროექტების დაგეგმვის გათვალისწინებით, ჩვენ დავიწყეთ პროექტში მონაწილეობასთან დაკავშირებული კომერციული და სტრატეგიული მოთხოვნების ანალიზი,“ - ციტირებს „Вести“ RWE-ს წარმომადგენლის სიტყვებს.

გერმანული კომპანიის გარდა, Nabucco-ს აქციონერები არიან ავსტრიული, უნგრული, თურქული, ბულგარული და რუმინული კომპანიებიც. თითოეულ მათგანი საერთო წილის 16,67%-ს ფლობს, თუმცა RWE მათ შორის ყველაზე მსხვილ მონაწილედ ითვლება.

Internet.ge