სტრატეგიული განვითარების სააგენტოს ინიციატივით, დღეს, კახეთის რეგიონის ტურისტული განვითარების სამუშაო ჯგუფის შეხვედრა გაიმართა. სააგენტოს ხელმძღვანელმა ივა დავითაიამ 2012-2013 წლის სამოქმედო გეგმა წარმოადგინა.

ღონისძიებაში მონაწილეობდნენ სამუშაო ჯგუფის წევრები – სახელმწიფო უწყებებისა და კერძო სექტორის წარმომადგენლები, ტურიზმის ეროვნული სააგენტო, ძეგლთა დაცვის სააგენტო, სოფლის მეურნეობის სამინისტრო,  არასამთავრობო და დონორი ორგანიზაციები, პროფესიული გაერთიანებები, ტუროპერატორთა ასოციაცია, ქართული ღვინის ასოციაცია, ღვინის მწარმოებლები.

შეხვედრაზე, კახეთში ტურიზმის განვითარების კონცეფციასა და მისი განხორციელების გზებზე იმსჯელეს, განიხილეს კონკრეტული აქტივობები, რომლებიც ამ მიმართულებით უახლოეს მომავალში იგეგმება, განსაკუთრებული ყურადღება დაეთმო სამუშაო ჯგუფის მიერ შემუშავებული საგანმანათლებლო-შემეცნებითი კამპანიის კონცეფციის ანალიზს.

კახეთის რეგიონის ტურისტული განვითარების სამუშაო ჯგუფის შეხვედრებს რეგულარული ხასიათი აქვთ და გარკვეული პერიოდულობით იმართება.

სტრატეგიული განვითარების სააგენტო პრეზიდენტის ბრძანებულებით, მიმდინარე წლის აპრილში შეიქმნა. მის ფუნქციას საქართველოში განსახორციელებელი ცალკეული ტურისტული და საინვესტიციო პროექტების შესრულების კოორდინაცია და მონიტორინგი შეადგენს. პირველ ეტაპზე, სააგენტოს ძირითადი მიმართულებები კახეთსა და იმერეთში, ასევე ლაზიკაში  დაგეგმილი პროექტების კოორდინაციაა.

internet.ge