„საგადასახო კოდექსში“ ცვლილება შედის, რომლის მიხედვით, ქონების გადასახადის გამოთვლისას მცირე ბიზნესის სტატუსის მქონე პირისთვის (მათი ბრუნვა 100 000 ლარია) შემოსავალის ოდენობად მხოლოდ მის 25 პროცენტს დაიანგარიშებენ.

აღნიშნულ საკითხზე, დღეს, აგრარულ საკითხთა კომიტეტის სხდომაზე იმსჯელეს.

პროექტის ავტორის, ზვიად კუკავას განმარტებით, იმ შემთხვევაში, თუ მცირე ბიზნესის სტატუსის მქონე პირებს ბრუნვა წელიწადში 100 000-ს ნაცვლად,  50 000 ლარამდე შეუმცირდებათ, მათი ქონების გადასახადი მხოლოდ  50 000 ლარის 25 პროცენტი იქნება, რაც მნიშვნელოვანი შეღავათია.

ამას გარდა, ერთ-ერთი ცვლილებით,  მიკრო-ბიზნესის (30 000 ლარამდე)  და ფიქსირებული გადასახადის გადამხდელის სტატუსის მქონე პირები შემოსავალში ამ საქმიანობიდან მიღებულ თანხას აღარ შეიტანენ.

კუკავას თქმით, ბევრი მაგალითი არსებობს იმისა, რომ მიკრობიზნესის სტატუსის მქონე პირს 30 000 ლარის გარდა სხვა შემოსავლებიც აქვს, ამიტომ, დაგეგმილი ცვლილების თანახმად, გადასახადის გადახდისას 30 000 მხედველობაში საერთოდ არ მიიღება. ხოლო, დამატებითი შემოსავალი 40 00 ლარს უნდა აღემატებოდეს, იმისთვის, რომ მათ ქონების გადასახადი დაერიცხოთ.

„ქონების გადასახადს მხოლოდ მაშინ გადაიხდის თუ 30 000 ლარის გარდა, დამატებით 40 000 ლარი მოუგროვდა. როგორც წესი, თითქმის არ არიან მიკრო-ბიზნესის ისეთი წარმომადგენლები, რომლებსაც დამატებით 40 000 ლარი უგროვდებათ, ამიტომ, ცვლილების თანახმად, ისინი გადასახადისგან ფაქტობრივად თავისუფლდებიან“, – დასძინა მან.

Internet.ge