2012 წლის პირველი 5 თვის განმავლობაში საქართველოში ფულადი გადარიცხვების მოცულობა 518,16 მილიონ დოლარს გაუტოლდა. ეროვნული ბანკის ცნობით, ეს მაჩვენებელი 9%-ით აღემატება გასული წელის ანალოგიურ პერიოდში დაფიქსირებულ ციფრებს.

საქართველოში ფულის შემოსვლის მთავარ წყაროდ კვლავ რუსეთი რჩება, საიდანაც მიმდინარე წლის იანვარ-მაისში მთლიანად შემოსული თანხის ნახევარზე მეტი - 268,86 მილიონი დოლარი გადმოირიცხა.

რუსეთის გარდა, დიდი ოდენობით ფულადი გადმორიცხვები ხორციელდება საბერძნეთიდან - 62,6 მლნ დოლარი, იტალიიდან - 44,8 მლნ, აშშ-დან - 32,1 მლნ, უკრაინიდან - 18,45 მლნ, ესპანეთიდან - 12,37 მლნ დოლარი. ამავე ჩამონათვალში არიან თურქეთი, ინდოეთი, დიდი ბრიტანეთი, ისრაელი და გერმანიაც.

გასული წლის ბოლოს ფულადი გადარიცხვების მოცულობამ რეკორდულ მაჩვენებელს - 1,26 მილიარდ დოლარს მიაღწია. სავარაუდოდ, ეს რიცხვი წელს გაიზრდება.

Internet.ge