ეკონომიკისა და მდგრადი განვითარების მისინსტრი ვერა ქობალია ქუთაისში დავით აღმაშენებლის სახელობის საერთაშორისო აეროპორტში დასაქმების მიზნით გამოცხადებულ კონკურსში გამარჯვებულებს შეხვდა.

ვერა ქობალიამ და გიორგი კარბელაშვილმა ქუთაისის აეროპორტის მომავალ თანამშრომლებს წარმატება მიულოცეს და მათი საქმიანობისთვის მნიშვნელოვან თემებზე ისაუბრეს. მინისტრმა აღნიშნა, რომ ახალი აეროპორტი გამორჩეული იქნება არამარტო არქიტექტურითა და ულტრათანამედროვე სისტემებით, არამედ, პირველ რიგში, პროფესიონალი თანამშრომლებითა და სერვისით.

"ამისთვის კი საჭიროა თითოეულმა თქვენგანმა სრული მონდომებით გაიაროს ყველა დაგეგმილი ტრეინინგი და მაქსიმალური პასუხისმგებლობით მოეკიდოს დაკისრებულ საქმეს. ვფიქრობ, რომ ამ პროცესში აუცილებელია გვქონდეს ორმხრივი კომუნიკაცია, რომ ნებისმიერი, თუნდაც მცირე პრობლემა ერთობლივად და სწრაფად მოვაგვაროთ. ძალიან კმაყოფილი ვარ კონკურსის შედეგებით, ველი თქვენგან ბევრ ახალ იდეას და გპირდებით მუდმივ მხარდაჭერას," - განაცხადა ვერა ქობალიამ.

კონკურსში გამარჯვებულთათვის მიმდინარე წლის აგვისტოს თვიდან დაიწყება სპეციალური სასწავლო კურსები, რომელიც აეროპორტის მომავალი თანამშრომლებისთვის როგორც თეორიულ, ისე პრაქტიკულ სწავლებას ითვალისწინებს.

Internet.ge