2012 წლის 17 სექტემბრიდან საქართველოს ეკონომიკისა და მდგრადი განვითარების სამინისტროს სისტემაში ფუნქციონირებას იწყებს საჯარო სამართლის იურიდიული პირი - სახელმწიფო ქონების ეროვნული სააგენტო.

სახელმწიფო ქონების შეძენით ან სარგებლობით დაინტერესებულ პირებს ოქტომბრიდან შესაძლებლობა მიეცემათ სწრაფი და ხარისხიანი მომსახურება ”ერთი სარკმლის პრინციპით” სააგენტოს სერვის ცენტრების მეშვეობით მიიღონ.

სსიპ - სახელმწიფო ქონების ეროვნული სააგენტო სახელმწიფო ქონების პრივატიზაციასთან, სარგებლობის უფლებით გადაცემასა და სახელმწიფოს წილობრივი მონაწილეობით შექმნილი საწარმოების მართვასთან დაკავშირებულ უფლებამოსილებებს განახორციელებს.

საწყის ეტაპზე, სააგენტო მომხმარებელს სახელმწიფო ქონების პრივატიზაციასა და სარგებლობის უფლებით გადაცემასთან დაკავშირებულ რამდენიმე სერვისს შესთავაზებს, რომელთა რიცხვის ზრდა და სრულყოფა ეტაპობრივად განხორციელდება.

თბილისის ფარგლებში სააგენტოს მომსახურების ოფისი თბილისის იუსტიციის სახლში, ხოლო რეგიონებში - შემოსავლების სამსახურის სერვის ცენტრებში განთავსდება.

სააგენტოს კონტროლს საქართველოს ეკონომიკისა და მდგრადი განვითარების სამინისტრო განახორციელებს.

Internet.ge