რუსეთის ნაციონალური ანტიოტერორისტული კომიტეტის უფროსის მოადგილე ვიქტორ ორლოვმა განაცხადა, რომ რუსული სპეცსამსახურები დაღესტანში სულ რაღაც 100 ბოევიკს ებრძვიან.

მისი თქმით, დაღესტანში მოქმედებს არაუმეტეს 10 ბანდფორმირებისა, რომლებშიც 10-12 ადამიანია გაწევრიანებული. ასეთ ბანდას კი ნებისმიერი დანაშაულის ჩადენა შეუძლია – განაცხადა ორლოვმა.

მთლიანობაში, მისი თქმით, აქტიურ ბოევიკთა ზუსტი რაოდენობის დასახელება რთულია. ასევე პრობლემას წარმოადგენენ ადამიანები, რომლებიც ამ ბანდებს ეხმარებიან.

ორლოვის განცხადებით, უფლებადამცველთა აზრით, ეს ადამიანები, უბრალოდ, მშვიდობიანად მისდევენ ისლამს და არანაირად არ ახდენენ გავლენას ტერორიზმზე რესპუბლიკაში.

‘’თუმცა, ჩვენი აზრით, მათი მხარდამჭერები ცალი ფეხით ტყეში არიან, ისინი შინაგანად მზად არიან იქ წავიდნენ და დიდი ძალისხმევაა საჭირო, რომ ეს არ დავუშვათ" – განაცხადა ორლოვმა.

ამასთან, მისი თქმით, ადამიანები, რომლებიც შემდგომ ამ ბანდებს ეთიშებიან, ამბობენ, რომ ისინი, უბრალოდ, ბანდიტიზმით არიან დაკავებულები და სულაც არ იბრძვიან ისლამისთვის.

Internet.ge