გორის სამხედრო ნაწილის სერჟანტს 26 წლის თენგიზ გელაშვილს 19 წლის ჯარისკაცის კობა მახარაშვილის თვითმკვლელობამდე მიყვანა ედება ბრალად. როგორც „ინტერნეტ.ჯი“-ს საქართველოს პროკურატურის პრესსამსახურის ხელმძღვანელმა ხათუნა იოსავამ განუცხადა, ეჭვმიტანილი უკვე დაკავებულია.

მისივე თქმით, პროკურატურა სერჟანტისთვის თავისუფლების 4 წლამდე აღკვეთას ითხოვს.

გორის რაიონულ სასამართლოში, სამხედრო ნაწილში გარდაცვლილი ჯარისკაცის საქმეზე  წინასასამართლო სხდომა გუშინ  გაიმართა.

ცნობილია, რომ  გელაშვილი,  მე-5 ქვეითი ბრიგადის 51-ე ბატალიონში კობა მახარაშვილთან ერთად მსახურობდა.

არსებული ინფორმაციით, მიმდინარე წლის  12 ივლისს, სამსახურეობრივი მოვალეობის შესრულების დროს,  გელაშვილმა კობა მახარაშვილს სხვა ჯარისკაცების თანდასწრებით სახეში ორჯერ გაარტყა, რის შემდეგაც კობა მახარაშვილმა სიცოცხლე თვითმკვლელობით დაასრულა.

შეგახსენებთ, რომ კობა მახარაშვილი მომხდარიდან რამდენიმე საათში თავი ცეცხლსასროლი იარაღით მოიკლა.

internet.ge