ოსლოში ნორვეგიელი ტერორისტის ანდერს ბრეივიკის სასამართლო პროცესი მიმდინარეობს. 

ნორვეგიის ისტორიაში პირველად, გადაწყდა, რომ სასამართლოს სხდომა პირდაპირ ეთერში იქნება ტრანსლირებული. გამონაკლისი იქნება მხოლოდ თავად ბრეივიკის სიტყვა, რადგან მოსამართლე მიიჩნევს, რომ ტერორისტი, თავის გამოსვლას, საკუთარი იდეების პროპაგანდირებისთვის გამოიყენებს.

სხდომას პირდაპირ ეთერში ნორვეგიული სამაუწყებლო კომპანია NRK გადასცემს, ვიდეოტრანსლაციის ყურება კი ინტერნეტ-საიტ Sky News-ზეა შესაძლებელი.

ბრეივიკი ტყვიაგაუმტარ კაბინაშია მოთავსებული, რადგან რამდენიმე დღის წინ მან განაცხადა, რომ მოკვლით ემუქრებიან.

ტერორისტი უკვე მიესალმა სასამართლოს და ეს ნაცისტური ჟესტით გააკეთა. მან უკვე ისიც განაცხადა, რომ არ სცნობს ნორვეგიულ სასამართლოს, რამდენადაც ქვეყნის ხელისუფლება მულტიკულტურალიზმის იდეას უჭერს მხარს. მან, ასევე, თავი „სამხედრო მეთაურად“ მიიჩნია და აღნიშნა, რომ მისი საქმე არა ჩვეულებრივმა სასამართლომ, არამედ სამხედრო ტრიბუნალმა უნდა განიხილოს.

ანდერს ბრეივიკს, რომელმაც 77 ადამიანი მოკლა, 21 წლით თავისუფლების აღკვეთა ემუქრება. თუმცა ეს იმ შემთხვევაში, თუ მას შეურაცხადად ჩათვლიან. როგორც ცნობილია, არსებობს ორი ფსიქიატრიული დასკვნა. ერთის თანახმად ბრეივიკს სერიოზული პარანოიალურ-შეზოფრენული პრობლემები აქვს, მეორეს თანახმად კი ის ფსიქიკურად ჯანმრთელია. საბოლოო გადაწყვეტილებას ამის შესახებაც სასამართლო მიღებს. თუ სასამართლო ბრეივიკს შეურაცხადად სცნობს, ტერორისტს განუსაზღვრელი ვადით იძულებითი მკურნალობა მოელის.