აფხაზეთის პროკურატურამ უმაღლეს სასამართლოს გადასცა საქართველოს მოქალაქის ზურაბ თორაძის საქმე, რომელსაც პირთა ჯგუფის მიერ დავალებული მკვლელობის მზადება, ე.წ. საზღვრის უკანონოდ გადაკვეთა და ცეცხლსასროლი იარაღის უკანონოდ შეძენა-ტარება ედება ბრალად.
კერძოდ, აფხაზმა გამომძიებლებმა დაადგინეს, რომ თორაძემ 2012 წლის 4 ივნისს უკანონოდ გადაკვეთა ე.წ. საზღვარი ენგურზე, რათა მოეკლა აფხაზეთის ე.წ. თავდაცვის სამინისტროს თანამშრომელი ლიზბერტ ფოცხორ-ოღლი.
მან აფხაზეთის ტერიტორიაზე შეიძინა ცეცხლსასროლი იარაღი, თუმცა პროკურატურის მიერ გატარებული ღონისძიებების შედეგად მისი გამოყენების მცდელობა აღკვეთილ იქნა.
ამ დროისათვის თორაძე დაკავებულია. მაქსიმალური სასჯელი, რომელიც მას შეიძლება წაუყენონ, 15 წლით თავისუფლების აღკვეთაა. ამის შესახებ აფხაზური მედია ადგილობრივ სამართალდამცავ ორგანოებზე დაყრდნობით წერს.
Internet.ge
