სასამართლო პრცესის მესამე დღეს ტერორისტმა განაცხადა, რომ მისი თანამოაზრეები ახალი დარტყმისთვის ემზადებიან. ბრეივიკის თქმით, ისინი მზად არიან ნებისმიერ დღეს განახორციელონ ისეთივე შეტევა, როგორიც მან მოაწყო 2011 წლის 22 ივლისს.

ასევე, ბრეივიკმა განაცხადა, რომ იმ „ხმაურიანი საქმისთვის“, რაც მან ჩაიდინა, სიკვდილით დასჯა დაშვებული უნდა იყოს. როგორც ცნობილია, ნორვეგიაში სასჯელის უმაღლესი ზომა 21-წლიანი პატიმრობაა, რაც ტერორისტს საკუთარი თავისთვის მოკრძალებულ სასჯელად ეჩვენება.

„მე ვერ ავიტან 21 წლით ციხეს. ეს ძალიან უბადრუკი სასჯელია. ჩემს შემთხვევაში შეიძლება ან სიკვდილი, ან თავისუფლება. მე არ მსურს სიკვდილი, მაგრამ ასეთ გადაწყვეტილებას პატივისცემით მოვეკიდები“ - განაცხადა მან.

აქვე ბრეივიკმა სინანული გამოთქვა იმასთან დაკავშირებით, რომ ერთ-ერთი მოსამართლე მისი პროცესიდან იმის გამო მოხსნეს, რომ მან ბრეივიკის სიკვდილით დასჯის შესახებ გამოთქვა აზრი.

სასამართლო პროცესის მესამე დღე მთლიანად მიეძღვნა ბრეივიკის შესაძლო კავშირებს უცხოელ ექსტრემისტებთან. პროკურორს არ სჯერა, რომ ბრეივიკი არის ე.წ. „ტამპლიერთა ორდენის“ - ანტიისლამისტთა უკიდურესად მემარჯვენე ქსელის წევრი. პროკურორის ასეთი პოზიციის გამო ბრეივიკი გაბრაზდა კიდეც და მოითხოვა, რომ პროცესის მონაწილეებმა თავი დაანებონ მის მასხრად აგდებას და მთავარ საკითხებზე ისაუბრონ.

Internet.ge