საქართველოს სასჯელაღსრულების, პრობაციისა და იურიდიული დახმარების საკითხთა სამინისტრო, პატიმრის გარდაცვალების შესახებ,  ინფორმაციას ავრცელებს და ზურაბ დელიანიძის ოჯახს სამძიმარს უცხადებს.  

სამინისტრო მიიჩნევს, რომ გარდაცვალების ფაქტი საჭიროებს დეტალურ შესწავლას, მას შემდეგ კი, რაც  გამოძიება დასრულდება, მსჯავრდებულ დელიანიძის გარდაცვალების შესახებ დამატებით ინფორმაციას, საზოგადოებას ამცნობს.

“„კონფიდენციალურობის დაცვის პრინციპიდან გამომდინარე, სამინისტროს არ სურდა დეტალური ინფორმაციის გავრცელება მსჯავრდებულის ჯანმრთელობის მდგომარეობის შესახებ, თუმცა, საზოგადოების მაღალი ინტერესიდან გამომდინარე და ზოგიერთ საინფორმაციო საშუალებაში გავრცელებული ინფორმაციის გამო, სამინისტრო საჭიროდ მიიჩნევს, ცნობილი გახადოს ზოგიერთი დეტალი: მსჯავრდებული ავადმყოფობდა ვენერიული დაავადების მწვავე ფორმით და მას სამედიცინო დეპარტამენტის მედპერსონალის მიერ ყოველგვარი შესაძლებელი მკურნალობა უტარდებოდა”,- აცხადებენ სამინისტროში.

მათი ინფორმაციით, მსჯავრდებულის გარდაცვალებასთან დაკავშირებით,  2012 წლის 1 მაისს  საქართველოს სასჯელაღსრულების, პრობაციისა და იურიდიული დახმარების საკითხთა სამინისტროს საგამოძიებო დეპარტამენტში, ისევე როგორც ნებისმიერი პატიმრის გარდაცვალების  შემთხვევაში, მყისიერად დაიწყო გამოძიება და დაინიშნა სასამართლო-სამედიცინო ექსპერტიზა.

„ზემოაღნიშნულის შესწავლა შესაძლებელია  მოითხოვოს და განახორციელოს  ასევე გარდაცვლილის ოჯახმა ალტერნატიული სამედიცინო ექსპერტიზის დანიშვნის გზით. სამინისტრო, თავის მხრივ, მას შემდეგ რაც დასრულდება გამოძიება ზემოაღნიშნულ ფაქტთან დაკავშირებით, ამცნობს საზოგადოებას მსჯავრდებულ დელიანიძის გარდაცვალების შესახებ დამატებით ინფორმაციას“,- ნათქვამია განცხადებაში.

ზემოაღნიშნულიდან გამომდინარე, სამინისტრო მოუწოდებს მასმედიის წარმომადგენლებს თავი შეიკავონ წინასწარი შეფასებებისა და პროგნოზებისაგან.

სასჯელაღსრულების სამინისტროს ცნობით, დელიანიძე  2011 წლის 13 დეკემბერს  გასამართლებული იქნა ბათუმის საქალაქო სასამართლოს მიერ, საქართველოს სსკ 260-ე მუხლის მე-2   ნაწილით (ნახევარი კილოგრამი მარიხუანას უკანონო შეძენა/ შენახვა), რისთვისაც მიესაჯა 6 წლით თავისუფლების აღკვეთა.

2012 წლის 7 მარტს მსჯავრდებული ზ.დელიანიძე, შემდგომი მკურნალობის მიზნით  გადაყვანილ იქნა #18 ბრალდებულთა და მსჯავრდებულთა სამკურნალო დაწესებულებაში და დაეწყო ინტენსიური მკურნალობის კურსი, თუმცა პატიმარი მიმდინარე წლის პირველ მაისს გარდაიცვალა.

Internet.ge