ქართველ ტერორისტებთან საპროცესო შეთანხმება აღარ გაფორმდება. ამის შესახებ „ინტერნეტ.ჯი“-ს სააპელაციო სასამართლოს პრესსამსახურში განუცხადეს.

საზოგადოებასთან ურთიერთობის დეპარტამენტში აცხადებენ, რომ დღეს გამართულ სასამართლო სხდომაზე პროკურორმა ვლადიმერ ვექილიანმა შეთანხმებაზე მოლაპარაკების შეწყვეტის მიზეზად, დაცვის მხარის მიერ წამოყენებული ის პირობები დაასახელა, რომელსაც პროკურატურა არ დათანხმდა.

როგორც ტერორისტული აქტების მოწყობაში ეჭვმიტანილი ძმები  არქანიების ადვოკატმა ჯონი ქობალიამ განაცხადა,მისთვის პროკურატურის გადაწყვეტილება უცნობია.

„არქანია საპროცესო შეთანხმების პირობებს დათანხმდა. რომლის მიხედვითაც, მას  მისჯილი 30 წლიდან  22 წელი უნდა მოეხადა, 5 წელი კი პირობითი დარჩენოდა. შედგა საპროცესო შეთანხმების ოქმიც,  თუმცა დღეს, მოულოდნელად, ვექილიანმა საპროცესო შეთანხმებაზე უარი განაცხადა“,- განუცხადა „ინტერნეტ.ჯი“-ს ადვოკატმა.

მორიგი სასამართლო პროცესი 23 მაისს გაიმართება.

Internet.ge