სასამართლომ 10 წლით თავისუფლების აღკვეთა მიუსაჯა ზეინალ სუიუნოვას, რომელსაც ახალი წლის ღამით, გამოძიების ვერსიით, წითელ მოედანზე ტერაქტის მოწყობა ჰქონდა დაგეგმილი.

მას ორგანიზებულ ჯგუფთან ერთად ტერაქტის, იარაღისა და ასაფეთქებელი მოწყობილობების დამზადების ბრალდება წაუყენეს.

როგორც `ლაიფ-ნიუსი~ სამართალდამცავ ორგანოებზე დაყრდნობით იუწყება, სუიუნოვა წითელ მოედანზე ბომბის აფეთქებას 2011 წლის 1 იანვარს აპირებდა. ის ამისთვის მოამზადა და მოსკოვში გაგზავნა `გუბდენსკის~ ბანდის ლიდერმა იბრაგიმჰაილ დაუდოვმა, რომლის დაჯგუფებაც დაღესტნის ტერიტორიაზე მოქმედებს.

ბანდის დანარჩენმა წევრებმა სუიუნოვა მოსკოვში, სასტუმრო `სპორტივნი კომპლექსში~ მოათავსეს. უფრო ადრე კი, დედაქალაქში შეიტანეს ასაფეთქებელი მოწყობილობა, რომლის დამზადებაშიც სუიუნოვაც მონაწილეობდა.

ამის შემდეგ, სუიუნოვას და ბანდის კიდევ ერთ წევრ ქალბატონს ზავჟატ დაუდოვას ტელეფონით აცნობეს ოპერაციის შემდგომი გეგმის შესახებ. მათ ასაფეთქებელი მოწყობილობა ტანზე უნდა დაემაგრებინათ. თუმცა სწორედ ამ დროს აფეთქება მოხდა და დაუდოვა ადგილზე დაიღუპა. სუიუნოვა, კი რომელმაც არ იცოდა სად იყო წითელი მოედანი, გაიქცა.

ის მალევე დაღესტანში იპოვეს და მოსკოვში ჩაიყვანეს. ტერორისტი ქალი 10 წელს საერთო რეჟიმის კოლონიაში მოიხდის.

internet.ge