უმაღლესი სპცსასამართლოს სხდომის დაწყებამდე, რომელმაც ქართველი ჟურნალისტის, გიორგი ღონღაძის მკვლელობასთან დაკავშირებით, ლეონიდ კუჩმას მიმართ საქმის არაღძვრის შესახებ დადგენილებაზე უკრაინის გენერალური პროკურატურის საჩივარი  უნდა განიხილოს, სასამართლოს შენობაში კუჩმას სიძე შევიდა - იუწყებიან უკრაინული გამოცემები.

უკრაინის ექს-პრეზიდენტის, ლეონიდ კუჩმას სიძეს, მილიარდერ  ვიქტორ პინჩუკს სასამართლოზე ზეწოლაში პირველად არ ადანაშაულებენ.

ამჯერადაც, მისი სასამართლოს შენობაში შესვლის გამო, დაზარალებულმა მხარემ განაცხადა, რომ „სასამართლოზე ზეწოლის თაობაზე“ პროკურატურაში განცხადებას შეიტანენ. ამის შესახებ გიორგი ღონღაძის ქვრივმა მიროსლავა ღონღაძემ, სოციალურ ქსელ „Facebook“-ზე დაწერა.

ლეონიდ კუჩმას ძალაუფლებისა და სამსახურებრივი უფლებამოვალეობების გადაჭარბებაში ადანაშაულებენ, რამაც საბოლოო ჯამში ჟურნალისტ გიორგი ღონღაძის მკვლელობა და საზოგადო მოღვაწის, ალექსეი პოდოლსკის წინააღმდეგ დანაშაულის ჩადენა განაპირობა.

პროკურატურა რამდენიმე ჩვენებას ეყრდნობა, რომელთა თანახმადაც, ლეონიდ კუჩმამ პირადად გასცა მითითება „საქმე გაერკვიათ ღონღაძესთან“.
internet.ge