გასულ წელს მომხდარ ყველაზე გახმაურებული მკვლელობის საქმეზე, ნაფიც მსაჯულთა სასამართლო მოწმეების დაკითხვას განაგრძობს.

სახალხო მსაჯულებმა, დამამძიმებელ გარემოებაში ჩადენილ მკვლელობაში ბრალდებული დავით რუსიშვილის მეგობრის, ეკა ღარიბაშვილის ჩვენება მოისმინეს, რომელიც მკვლელობამდე ცოტა ხნით ადრე რუსიშვილს შეხვდა.

ეკა ღარიბაშვილი იხსენებს, რომ 2011 წლის 17 ოქტომბერს, დავით რუსიშვილს დაახლოებით 15:00 საათამდე რამდენიმე წუთით ადრე, კონსერვატორიასთან შეხვდა, რის შემდეგაც რუსიშვილი ლაღიძის ქუჩის მიმართულებით წავიდა.

ღარიბაშვილი კონსერვატორიასთან მეგობარს ელოდებოდა, დაახლოებით 15 წუთში მან სროლის ხმა გაიგონა, რუსთაველზე ჩასვლის შემდეგ კი ცნობილი გახდა, რომ რუსთაველზე მოკლული იყო ახალგაზრდა ბიჭი.

შეგახსენებთ, რომ რამდენიმე შეიარაღებული პირი, 23 წლის ზურა ტარყაშვილის ლაღიძის ქუჩიდან, რუსთაველის მიმართულებით, დაახლოებით 15:10  საათზე დაედევნა. ზურა ტარყაშვილს 11 ტყვია ჰქონდა მოხვედრილი, როგორც რუსიშვილმა პირველი ჩვენებისას განაცხადა, მან ტარყაშვილს პირველმა ესროლა, მისი თქმით, ტარყაშვილს ესროდა ირაკლი აგლაძეც, ხოლო საკონტროლო გასროლა განახორციელა 53 წლის ივერი გოგბერაშვილმა.

internet.ge