ნაფიცმსაჯულები 23 წლის ზურა ტარყაშვილის მკვლელობაში ბრალდებულს ვერდიქტს დღეს გამოუტანენ.

თბილისის საქალაქო სასამართლოში პროცესი ამ წუთებში მიმდინარეობს. 19 წლის დავით რუსიშვილის განაჩენი რამოდენიმე საათში გახდება ცნობილი.

ზურა ტარყაშვილი გასული წლის 17 ოქტომბერს, თბილისში, რუსთაველის გამზირზე მოკლეს. რამდენიმე შეიარაღებული პირი, რომელსაც მისი მოკვლა წინასწარ ჰქონდა დაგეგმილი, ტარყაშვილს ლაღიძის ქუჩაზე აედევნა. მას 11 ტყვია ჰქონდა მოხვედრილი, მათ შორის სამი საკონტროლო გასროლა იყო.

ამ დროისთვის მკვლელობის მუხლით ბრალი წაყენებული მხოლოდ სამ პირს აქვს: ივერი გოგბერაშვილს, ირაკლი აგლაძესა და დავით რუსიშვილს. დაკავებულია ივერი გოგბერაშვილი და დავით რუსიშვილი, ირაკლი აგლაძე კი ამ დრომდე მიმალვაში იმყოფება.

დავით რუსიშვილი პოლიციამ მკვლელობის მესამე დღეს დააკავა, მან ჩადენილი დანაშაული აღიარა და დეტალურად აღწერა თუ როგორ უთვალთვალებდა ზურას, როგორ დაგეგმეს და განახორციელეს მკვლელობა, თუმცა მოგვიანებით ჩვენება შეცვალა და სწორედ ამიტომ წარსდგა ნაფიც მსაჯულთა წინაშე.

რუსიშვილმა უნდა შეძლოს 12 ნაფიცი მსაჯულის დარწმუნება, რომ დანაშაული, რომელზეც ის მკვლელობიდან მესამე დღეს საუბრობდა, თავად არ ჩაუდენია. მისი ადვოკატი ალაპარაკდა მკვლელობაში მონაწილე სხვა პირზეც. რომელსაც ჯერ-ჯერობით მხოლოდ დანაშაულის დაფარვაში ედება ბრალი და მიმალვაში იმყოფება.

პროცესზე უკვე დაიკითხა რამდენიმე მნიშვნელოვანი მოწმე, რომლებიც ბრალდებულის ადვოკატის განცხადებას, რომ რუსიშვილი მკვლელობის დღეს რუსთაველზე არ იმყოფებოდა, ჩვენებებით აბათილებენ. ასევე გამოქვეყნდა მნიშვნელოვანი მტკიცებულება - რუსიშვილისა და გოგბერაშვილის სატელეფონო საუბრების ამონაწერი, რომლითაც დასტურდება რომ მკვლელობის დღეს რუსიშვილსა და გოგბერაშვილს შორის სატელეფონო საუბარი 11-ჯერ შედგა, პირველი ზარი დილით განხორციელდა, უკანასკნელი კი მკვლელობამდე რამდენიმე წუთით ადრე.

ექსპერტიზამ დაადასტურა, რომ რუსიშვილის ტანსაცმელზე აღმოჩენილი იქნა დენთის კვალი, რომელიც იარაღიდან გასროლას ადასტურებს. ბრალდება მტკიცებულებების გამოქვეყნებას კვლავ განაგრძობს.

23 წლის ზურა ტარყაშვილის დამამძიმებელ გარემოებაში მკვლელობა, მესამე საქმეა, რომელსაც ნაფიცი მსაჯულები განიხილავენ.

Internet.ge