თბილისის საქალაქო სასამართლოს ადმინისტრაციულ საქმეთა კოლეგიის გადაწყვეტილებით, ნაწილობრივ დაკმაყოფილდა ჩიტო გოიევის სასარჩელო განცხადება მოპასუხეების თბილისის გლდანი-ნაძალადევის რაიონის გამგეობის,  თბილისის მერიის და მესამე პირების - ცისანა გოიევასა და ვასილ გოგნიაშვილის მიმართ. 

სასამართლოს გადაწყვეტილებით, ბათილად იქნა ცნობილი თბილისის მერიის 2011 წლის 24 ნოემბრის განკარგულება, ასევე სადაო საკითხის გადაუწყვეტლად ბათილად იქნა ცნობილი გლდანი-ნაძალადევის რაიონის გამგეობის 2011 წლის 31 მარტის  განკარგულება და ამავე რაიონის გამგეობის მიერ 2011 წლის 31 მარტს გაცემული საკუთრების უფლების მოწმობა. 

სასამართლომ მხარეთა ახსნა-განმარტებების მოსმენის, საქმეში არსებული მტკიცებულებების შეფასების შედეგად მიიჩნია, რომ თბილისის გლდანი-ნაძალადევის რაიონის გამგეობის მიერ, უძრავი ნივთის პრივატიზაციის შესახებ 2011 წლის 31 მარტის №427 განკარგულების მიღებისას საქმის ფაქტობრივი გარემოებების შესწავლა სრულყოფილად არ მომხდარა.

სასამართლოს გადაწყვეტილებით,  თბილისის გლდანი-ნაძალადევის რაიონის გამგეობას  დაევალა საქმისათვის არსებითი მნიშვნელობის მქონე გარემოებების სრულყოფილადშესწავლისა და შეფასების შედეგად, კანონით დადგენილ ვადაში, გამოსცეს ახალი ინდივიდუალური ადმინისტრაციულ-სამართლებრივი აქტი უძრავი ნივთის პრივატიზების თაობაზე.

გადაწყვეტილება შეიძლება გასაჩივრდეს დასაბუთებული გადაწყვეტილების მხარეთათვის გადაცემიდან 14 დღის ვადაში თბილისის სააპელაციო სასამართლოში.

Internet.ge