ოჩამჩირეში დაკავებული, 1982 წელს დაბადებული ზურაბ თორაძე, რომელიც თავდაცვის სამინისტროს მაღლჩინოსნის, ოპერატიული განყოფილების „ვოსტოკის“ ხელმძღვანელის ლიზბერტ ფოცხო-ოღლის მკვლელობის მზადებაშია ეჭვმიტანილი, სპეცოპერაციისას აიყვანეს.

როგორც ადგილობრივი სააგენტოები წერენ, თორაძის გეგმების შესახებ სპეცსამსახურებმა სატელეფონო შეტყობინებებიდან - „გალის რაიონში არაფერი გამომივიდა, ოჩამჩირეში მოვსინჯავ“ - შეიტყვეს.

ამის შემდეგ თორაძე ბებიასთან ჩავიდა ოჩამჩირეში, თუმცა მოხუცმა ქალბატონმა ის სახლში არ შეუშვა, რადგან იცოდა, რომ ადრე ნასამართლევი იყო. მაშინ თორაძემ ბინა, როგორც დამსვენებელმა, ისე იქირავა.

„რამდენადაც მას სლავური გარეგნობა აქვს და რუსულად კარგად საუბრობდა, ოთახის დაქირავება არ გაძნელებია. თუმცა სახლის მეპატრონემ რაღაც იეჭვა და შსს-ს რაიონულ განყოფილებას აცნობა“ - აცხადებენ სოხუმში.

ე.წ. სამართალდამცავი უწყებების განცხადებით, ზოგიერთმა ადგილობრივმა განაცხადა, რომ დაკავებული შენიშნული ჰყავთ, როცა ფოტოებს უღებდა სახლებს, სადაც აფხაზეთის ძალოვანი უწყებების ხელმძღვანელები ცხოვრობენ.

აფხაზეთში ბოლო პერიოდში არაერთხელ განაცხადეს „ქართველი დივერსანტების“ არსებობის შესახებ. შესაბამისად, გალის რაიონში, როგორც სეპარატისტები აცხადებენ, უწყვეტ რეჟიმში ატარებენ სპეცოპერაციებს.

internet.ge