ცეცხლი
მამაკაცმა ნიუ-იორკის ცნობილ ცათამბჯენთან Empire State Building-თან გახსნა, სადაც ზოგადად, ძალიან ბევრი ტურისტი
მოძრაობს. ინცინდენტის შედეგად დაიღუპა 2 და დაიჭრა 10 ადამიანი.
მოგვიანებით გაირკვა, რომ პირი, რომელმაც
ცეცხლი გახსნა, ქალის ტანსაცმლის დიზაინერ-კონსტრუქტორი იყო, რომელმაც, ვიდრე
პოლიციელები მოკლავდნენ, თავისი ყოფილი უფროსი გაისტუმრა იმქვეყნად.
ხალხმრავალ ქუჩაზე ისეთი სიტუაცია შეიქმნა,
რომ ნიუ-იორკის მერი არ გამორიცხავს, თუკი რამდენიმე ადამიანი სამართალდამცველების
მიერ გახსნილმა ცეცხლმა დაჭრა.
პოლიციის მონაცემებით, მამაკაცი, რომელმაც
სროლა ატეხა, 53 წლის ჯეფრი ჯონსონი იყო, მისი მსხვერპლის ვინაობა კი არ
ხმაურდება, თუმცა ცნობილია, რომ ის ჯონსონის 41 წლის კოლეგა იყო.
ნიუ-იორკის პოლიციის კომისარმა რეი კელიმ
განაცხადა, რომ ჯონსონი ერთი წლის წინ კომპანია Hazan Import-იდან
გაათავისუფლეს. ფირმის ოფისი სწორედ ცათამბჯენის ახლოს მდებარეობს. დიზაინერმა იქ
6 წელი იმუშავა.
სამსახურიდან დათხოვნამ მამაკაცი განარისხა და ყოფილ კოლეგას თავში
სასიკვდილო ჭრილობა 45 კალიბრის პისტოლეტიდან მიაყენა. მან მსხვერპლს სამი ტყვია
ესროლა.
კელის თქმით, მკვლელს ერთ-ერთი მუშა დაედევნა, რომელმაც გზად ორი
პოლიციელი გააფრთხილა მომხდარის შესახებ. არაორდინალური სიტუაციის გამო
პოლიციელებმა ეჭვმიტანილი ადგილზევე მოკლეს.
თვითმხილველები ყვებიან, რომ მკვლელმა უმისამართო ცეცხლი გახსნა, რის
გამოც ხალხი ქუჩაში მოკვეთილივით ცვიოდა. საბედნიეროდ, დაჭრილების მდგომარეობა
კრიტიკული არ არის და არცერთის სიცოცხლეს საფრთხე არ ემუქრება.
Internet.ge
