რუსეთის შავი ზღვის ფლოტის რამდენიმე საბრძოლო ხომალდი უკვე მზადყოფნაშია, რათა საჭიროების შემთხვევაში სირიისკენ დაიძრას. ამის შესახებ რუსეთის შეიარაღებული ძალების გენშტაბში ოფიციალურად განაცხადეს.

„იმასთან დაკავშირებით, რომ ხმელთაშუა ზღვა ჩვენი შავი ზღვის ფლოტის პასუხისმგებლობის ზონაშია, სრულიად რეალურია, რომ საჭიროების შემთხვევაში საბრძოლო ხომალდები იქ, ტარტუსში მდებარე რუსეთის სამხედრო-საზღვაო ფლოტის მატერიალურ-ტექნიკური უზრუნველყოფის პუნქტის უსაფრთხოების დასაცავად წავლენ,“ - განაცხადეს გენშტაბში.

სრულ მზადყოფნაშია და ზღვაში გასვლის ბრძანებას ელოდება რამდენიმე გემი, მათ შორის, დიდი სადესანტო ხომალდები, რომელთა ბორტებზეც საზღვაო ქვეითთა დანაყოფებია განთავსებული.

თუმცა გენშტაბმა უარყო გავრცელებული ინფორმაცია იმის შესახებ, რომ ტარტუსისკენ უკვე გაემართა რუსეთის ერთი სამხედრო გემი.

„ჩვენი გემები სევასტოპოლის ბაზაზე იმყოფებიან, დიდი სადესანტო ხომალდის „ცეზარ კუნიკოვის“ გამოკლებით. მაგრამ ის მოდის არა შავი ზღვიდან ხმელთაშუა ზღვაში, არამედ პირიქით, ხმელთაშუა ზღვიდან შავ ზღვაში. ის მოდის იტალიური მესინას პორტიდან და დღეს უკვე სევასტოპოლში იქნება,“ - განაცხადეს გენშაბში და დასძინეს, რომ ამერიკელებს ან დაზვერვა უმუშავებთ ცუდად ან ისინი სკოლაში გეოგრაფიას არ სწავლობდნენ.

სირიის პორტ ტარტუსის დასაცავად იქ რუსული გემების გაგზავნის შესახებ ინფორმაცია ტელეკომპანია NBC-მ გაავრცელა.

როგორც ცნობილია, ტარტუსში განთავსებულია რუსეთის ერთადერთი საზღვარგარეთული სამხედრო ბაზა. არ იგულისხმება ყოფილი საბჭოთა კავშირის ტერიტორია. ეს მატერიალურ-ტექნიკური მომარაგების პუნქტია, სადაც საბრძოლო ხომალდების ბაზირებაა შესაძლებელი ხმელთაშუა ზღვაში ამოცანების შესასრულებლად - წერს „ვესტი რუ“.

internet.ge