როგორც „კავკაზ-ონლაინი“ მახაჩკალის მკვიდრ მაგომედრასულ ალიევზე დაყრდნობით იუწყება, დაღესტანში რუსული ტანკებია გადასროლილი. ალიევის თქმით, მახაჩკალის რკინიგზის სადგურზე მან საკუთარი თვალით ნახა რამდენიმე შემადგენლობა, რომელიც მძიმე სამხედრო ტექნიკით იყო დათვირთული.

რესპუბლიკის შსს-ში ამბობენ, რომ ამასთან დაკავშირებით არაფერი იციან.
„შემადგენლობა ტანკებითაა სავსე. საით წავა ეს ტვირთი არ ვიცი, მაგრამ ჩემმა ნაცნობმა შემატყობინა, რომ მთელი ტექნიკა კონცენტრირებულია მახაჩკალის გარეუბანზე - სოფელ კრასნოარმეისკზე. ასეთი რამ მანამდე არ ყოფილა. როგორც წესი, ტანკები სხვა ადგილებზე იყო ხოლმე დისლოცირებული. როგორც ჩანს, დაღესტნის დედაქალაქს ახალი სპეცოპერაციებისთვის ამზადებენ“ - განაცხადა ალიევმა.

თუმცა შსს-ში ამბობენ, რომ რესპუბლიკაში ვითარება სტაბილურია და ტექნიკის მობილიზების აუცილებლობას ვერ ხედავენ.

დაღესტნის პარლამენტის ვიცე-სპიკერი ნიკოლაი ალჩიევი კი ამბობს, რომ არაფერი განსაკუთრებული არ ხდება და უბრალოდ, ძალების როტაცია მიმდინარეობს.

internet.ge