ბათუმში დღეს, საქართველოს თავდაცვისა და უსაფრთხოების კონფერენცია გაიხსნა.

კონფერენციის მონაწილეები ორი დღის განმავლობაში ისეთ საკითხებს განიხილავენ, როგორიცაა უსაფრთხოება ევროპასა და სამხრეთ კავკასიის რეგიონში, კიბერ უსაფრთხოება, ISAF-ის მისია და სამომავლო გეგმები, ნატო ჩიკაგოს სამიტის შემდეგ ევროატლანტიკური უსაფრთხოება, მომავალი საფრთხეები და გამოწვევები.

კონფერენციაში მონაწილეობას, როგორც საქართველოს ეროვნული უსაფრთხოების სექტორის წარმომადგენლები, ასევე, პარტნიორი ქვეყნებიდან მოწვეული სტუმრები, სამთავრობო, არასამთავრობო და საერთაშორისო ორგანიზაციები იღებენ.

სამინისტროს ინფორმაციით, კონფერენცია წარმოადგენს ერთის მხრივ თავდაცვის სამინისტროსა და სამოქალაქო საზოგადოებას შორის, ხოლო მეორეს მხრივ პარტნიორ ქვეყნებთან აზრთა გაზიარების და დიალოგის საუკეთესო შესაძლებლობას.

უკანასკნელი წლების განმავლობაში საქართველოს თავდაცვის კონფერენცია სამხრეთ კავკასიაში უსაფრთხოების პოლიტიკის ერთგვარ ფორუმად ჩამოყალიბდა. თავდაცვის სამინისტროს მიერ ორგანიზებული კონფერენცია  წელიწადში ორჯერ იმართება.

ხვალ, კონფერენციას ნატოს გენერალური მდივნის მოადგილე ალექსანდრე ვერშბოუ შეუერთდება. ის შეხვედრას გამართავს საქართველოს თავდაცვის მინისტრთან ბაჩო ახალაიასთან. კონფერენციის პარალელურად მინისტრს  უცხოელ სტუმრებთან ინდივიდუალური შეხვედრებიც ექნება.

internet.ge