მოსკოვი ჩრდილოეთ კავკასიის რესპუბლიკებში ტერორისტულ საფრთხეს ებრძვის. ამის გამო, ყარაჩაი-ჩერქეზეთის ყარაჩაევსკისა და მალოყარაჩაევსკის მუნიციპალური რაიონების ადმინისტრაციული საზღვრის რაიონში, კონტრტერორისტული რეჟიმი ამოქმედდა.

ოფიციალური ინფორმაციით, აღნიშნული ზომები ისლამ უზდენოვის ბანდიტური დაჯგუფების დანაშაულებრივი საქმიანობის აღკვეთის გამო გახდა საჭირო.

რაიონიდან, სადაც კონტრტერორისტული ოპერაცია ტარდება, ადგილობრივი მოსახლეობა გაყვანილია.

რამდენიმე დღის წინ კი რუსული მედია სამხედრო ძალების დაღესტანში მობილიზაციის შესახებ იუწყებოდა. ინფორმაციის თანახმად, ჩეჩნეთიდან დაღესტანში 25 ათასამდე შინაგანი ჯარის წარმომადგენლი და სამხედრო ტექნიკა გადაისროლეს.

დაღესტნის რესპუბლიკის ხელმძღვანელობამ ეს ინფორმაცია კატეგორიულად უარყო და განაცხადა, რომ დაღესტანში მხოლოდ 2000 სამხედრო პირია შეყვანილი და დაგეგმილია არა რაიმე სამხედრო ოპერაცია, არამედ რუსეთის ფედერაციის შსს-ს დროებითი ოპერატიული ჯგუფის შექმნა, რომლის მიზანიც სამართალდაცავი ბლოკის გაძლიერებაა. მიზეზი აქაც ტერორისტული საფრთხეა, რომელთან ბრძოლაც, ოფიციალური ინფორმაციის თანახმად, რესპუბლიკის ზოგიერთ რაიონში სამართალდამცავი ორგანოების კიდევ უფრო გაძლიერებას საჭიროებს.

internet.ge