საქართველოს მიერ, რუსეთის ფედერაციის მიმართ, „ღია ცის“ ხელშეკრულებით ნაკისრი ვალდებულებების შესრულებაზე უარის თქმამ, მოსკოვს ომზე ფიქრები აუშალა. რუსი ექსპერტების განცხადებით, ეს „მორიგი კონფლიქტია საქართველოსა და რუსეთს შორის“ და „თბილისის მხრიდან საომარ სამზადისზე მიუთითებს“.

ასეთი შინაარსის განცახდება გააკეთა რუსეთის საგარეო საქმეთა სამინისტროს დიპლომატიური აკადემიის აქტუალური საერთაშორისო პრობლემების ინსტიტუტის დირექტორმა ივან საფრანჩუკმა. მისი თქმით, „ღია ცის“ ხელშეკრულება არის ერთ-ერთი ფუძემდებლური დოკუმენტი  და ერთ-ერთი ზომა ეუთო-ს სივრცეში სამხედრო-პოლიტიკურ სფეროში ნდობის უზრუნველსაყოფად, ამიტომ ნებისმიერი დემარში ამ შეთანხმების არშესრულების ან მისგან გამოსვლისა, არის ფაქტობრივი დასტური საომარი სამზადისისათვის, რომელიც აღნიშნულ ქვეყანას სურს, რომ დამალოს“ - განაცხადა საფრანჩუკმა.

რუსეთის საგარეო საქმეთა სამინისტროს ოფიციალური განცხადება არ გაუკეთებია. რუსული მედია ჯერ მხოლოდ ექსპერტებზე დაყრდნობით წერს საქართველოს „გეგმებზე ომის დაწყებასთან დაკავშირებით“.

შეგახსენებთ, საქართველოს საგარეო საქმეთა სამინისტრომ განაცხადა, რომ აღნიშნული გადაწყვეტყილება თბილისმა სწორედ რუსეთის მიერ ხელშეკრულებით ნაკისრი გარკვეული ვალდებულებების შესრულების შეწყვეტის საპასუხოდ გადადგა, რამდენადაც რუსეთი „ღია ცის“ ხელშეკრულებას აფხაზეთისა და ცხინვალის რეგიონის „დამოუკიდებლობის“ ლეგალიზაციისთვის იყენებს.

Internet.ge