დავით ზირაქაშვილისა და ვიქტორ კოლელიშვილის “კლერმონ ოვერნი” საფრანგეთის “ტოპ 14”-ის ლიდერია 7 ტურის შემდეგ, რომელიც “ქართული დერბით” გაიხსნა კლერმონში, სადაც ქართველების “კლერმონ ოვერნმა” მშობლიურ “მარსელ მიშლენზე” ზურაბ ჟვანიას “სტად ფრანსეს” უმძიმეს ბრძოლაში 28:25 მოუგო. ტრავმების გამო ქართველ ლეგიონერებს არ უთამაშიათ.

პირველად ამ სეზონზე “ტულონის” სასტარტო შემადგენლობაში გამოჩნდა საქართველოს ნაკრების შერკინების მეორე ხაზელი კოტე მიქაუტაძე, რომელმაც საფრანგეთის “ტოპ 14”-ის მე-7 ტურში ჯაბა ბრეგვაძისა და ვასილ კაკოვინის “ტულუზასთან” მარცხიან შეტაკებაში (9:32) 4 ნომრის პოზიციაზე ითამაშა.

ტრავმის გამო ტულონურ რაზმში არ უთამაშია “ბორჯღალოსანთა” ბურჯს დავით ქუბრიაშვილს, ხოლო ლევან ჩილაჩავა განაცხადში ვერ მოხვდა. ასევე ტრავმის გამო არ გამოვიდნენ მოედანზე ტულუზელები: ბრეგვაძე და კაკოვინი.

მამუკა გორგოძის, გიორგი ჟღენტისა და მიხეილ ნარიაშვილის “მონპელიემ” უმძიმეს ბრძოლაში შეძლო გარდატეხის შეტანა და ტრავმირებული ანტონ ფეიქრიშვილის “კასტრის” დამარცხება 19:12. გორგოძე და ჟღენტი სასტარტოში გამოვიდნენ, ხოლო ნარიაშვილი ტრავმირებულია.

Internet.ge