საქართველოს ნაკრების შერკინების ბურჯი ანტონ ფეიქრიშვილი ტრავმით გამოწვეული ხანგრძლივი შესვენების შემდეგ მოედანს უბრუნდება - “კასტრის” 25 წლის “ბორჯღალოსანი” 5 ოქტომბერს, პარასკევს თავის გუნდს კლერმონში გაჰყვება, სადაც საფრანგეთის “ტოპ 14”-ის მე-8 ტურის მთავარი შეტაკება აქვს დათო ზირაქაშვილისა და ვიქტორ კოლელიშვილის “კლერმონ ოვერნთან”.

ამჟამად “კასტრს” 7 თამაშში 3 მოგება, 1 ფრე და 3 წაგება აქვს, რის შედეგადაც 16 ქულით მე-8 პოზიცია უკავია სატურნირო ცხრილში. შეგახსენებთ, რომ 183 სანტიმეტრიანი და 114 კილოგრამიანი ფეიქრიშვილი 2010 წელს გადავიდა “კასტრში” “აჟანიდან” და ეტაპობრივად დაიმკვიდრა ადგილი ახალი გუნდის ძირითად შემადგენლობაში.

 internet.ge