საქართველოს ნაკრების ორი მორკინალის, დათო ზირაქაშვილისა და გიორგი ჟღენტის დუელი გაიმართება დღეს საფრანგეთში - “ტოპ 14”-ის 24-ე ტურის ცენტრალურ შეხვედრაში. ზირაქაშვილის “კლერმონ ოვერნი” მშობლიურ “მარსელ მიშლენზე” ჟღენტის “მონპელიეს” შეერკინება და “ბორჯღალოსანთა” დუელიც სწორედ აქ შედგება.

 შეგახსენებთ, რომ ამ უმნიშვნელოვანეს მატჩში, მცირე ტრავმის გამო “მონპელიეს” დააკლდება საქართველოს საუკეთესო მორაგბე მამუკა გორგოძე, რომელმაც დაზიანება “ლიონთან”,  წინა ტურის შეხვედრაში მიიღო, სადაც 3 ლელო დადო.

ამას გარდა, მონპელიელთა განაცხადში ვერ მოხვდნენ: ახალგაზრდა ბურჯი მიხეილ ნარიაშვილი და მისი გამოცდილი კოლეგა გოდერძი შველიძე, რომელიც ბოლო ინფორმაციით, სეზონის დასრულების შემდეგ კლუბს დატოვებს.

რაც შეეხება “კლერმონ ოვერნის” ახალგაზრდა ქართველ მესამე ხაზელ ვიქტორ კოლელიშვილს, ის ჯერჯერობით “ესპუარებში” (მეორე გუნდი) თამაშობს.

“კლერმონ ოვერნი”–“მონპელიეს” მატჩი დღეს თბილისის დროით 22.45 საათზე დაიწყება და მისი ნახვა რაგბის გულშემატკივრებს სხვადასხვა ლაივსთრიმების საშულებით შეუძლიათ ინტერნეტში.

ფრანგულ “ტოპ 14”-ში რეგულარული სეზონის დასრულების შემდეგ, ფლეი-ოფში საჩემპიონო ბრძოლას 6 საუკეთესო გუნდი აგრძელებს. 1-2-ე ადგილზე გასული გუნდები პირდაპირ ერთმატჩა საშინაო ნახევარფინალში ხვდებიან, ხოლო 3-4-ე ადილებზე გასულები ასევე ერთმატჩა მეოთხედფინალში 5-6-ე პოზიციების დამკავებელ გუნდებს უმასპინძლებენ. რეგულარული ჩემპიონატის დასრულებამდე 3 ტურია დარჩენილი. ჯერ-ჯერობით “კლერმონ ოვერნი” 2-ე ადგილზეა, ხოლო “მონპელიე” მე-4-ზე.  

Internet.ge