თორნიკე შენგელიამ საუკეთესო მატჩი ჩაატარა “ბრუკლინ ნეთსის” შემადგენლობაში საზაფხულო ლიგის მე-3 შეხვედრაში “ფილადელფია 76”-თან (71:79) - საქართველოს ნაკრების ფორვარდმა 26.41 წუთში 17 ქულა, 6 მოხსნა და 2 შედეგიანი გადაცემა გააკეთა.

“თოკო” ნამდვილი ლიდერი იყო თავისი გუნდისა, ჩანს რომ მან ადაპტაცია გაიარა და პოტენციალის ჩვენება დაიწყო - კლუბის ოფიციალურ ვებ-გვერდზე ჩატარებულ ინტერაქტიულ გამოკითხვაში: “ვინ მოგხიბლათ დღეს ყველაზე მეტად?” ხმათა 57 პროცენტით სწორედ 20 წლის ქართველი ლიდერობს.

შენგელიამ 9-ჯერ სტყორცნა ორქულიანი ზონიდან და 5-ჯერ ჩააგდო, 4 სამქულიანიდან 1 ზუსტი გამოდგა, ხოლო 6 საჯარიმოდან ექვსივე კალათში მოათავსა.

თორნიკე შენგელია და მისი “ბრუკლინ ნეთსი” საზაფხულო ლიგის მორიგ შეხვედრას ხვალ დილით, ყველაზე ძლიერ მეტოქესთან, ნბა-ს გასული სეზონის ფინალისტ “ოკლაჰომა სითი თანდერთან” გამართავენ.

internet.ge