“ის იყო განსაკუთრებული. მან მართლაც მაღალ დონეზე ჩაატარა, როგორც საზაფხულო კემპი, ასევე საზაფხულო ლიგაც. ის გამუდმებით უმატებს, ყოველდღე უკეთესი ხდება და ვფიქრობთ, რომ მას აქვს შანსი ნბა-ს სოლიდური მოთამაშე გახდეს” - ასეთი შეფასება მისცა “ბრუკლინ ნეთსის” მთავარმა მწვრთნელმა ევერი ჯონსონმა გუნდის ახალწვეულს თორნიკე შენგელიას “ნიუ იორკ პოსტთან” საუბრისას, მას შემდეგ, რაც ქართველმა საზაფხულო კემპი და ლიგის 4 მატჩი ჩაატარა.

დღეს გამთენიისას საქართველოს ნაკრების ფორვარდს ყველაზე მეტი სათამაშო დრო მიეცა საზაფხულო ლიგის განმავლობაში “ბრუკლინ ნეთსის” მე-4 შეხვედრაში ნბა-ს გასული სეზონის სუპერფინალისტ “ოკლაჰომა სითი თანდერთან” (86:87) - საქართველოს ნაკრების ფორვარდი მოედანზე 27.14 წუთის განმავლობაში იმყოფებოდა.

დროის ამ მონაკვეთში “თოკომ” 8 ქულა და 4 მოხსნა მოუტანა თავის გუნდს - 20 წლის კალათბურთელმა 7-დან 3 ორქულიანი ჩააგდო, 1 სამქულიანი ააცილა და 4-დან 2 საჯარიმო მოათავსა ზუსტად.

internet.ge