ოლიმპიურ ხალიჩაზე გასულმა სამმა ქართველმა სპორტსმენმა  მერვედფინალური ეტაპი წარმატებით დაძლია.

სპორტისა და ახალგაზრდობის სამინისტროს ინფორმაციით, 60 კილოგრამამდე წონით კატეგორიაში მალხაზ ზარქუას ძალზე ძლიერი მოწინააღმდეგე შეხვდა – წინა ოლიმპიადის ვერცხლისმედალოსანი და სამგზის ევროპის ჩემპიონი, უკრაინელი ვასილ ფიოდორიშინი. ქართველმა მისი დამარცხება ორ სეტში შეძლო – პირველში ერთი ქულა აუღო, ხოლო მეორეში ზედიზედ სამჯერ გაუკეთა ქულიანი ილეთი. ზარქუას შემდეგ ეტაპზეც ძლიერი მოწინააღმდეგე ჰყავს – ამერიკელი კოულმენ სკოტი.

84 კილოგრამამდე წონით კატეგორიაში 21 წლის დავით მარსაგიშვილმა შანსი არ დაუტოვა მონღოლ უიტუმენ ორგოდოლს – პირველ სეტში მართალია კონტრილეთზე წამოეგო და 0:1 ჩამორჩა, მაგრამ შემდეგ ზედიზედ 9 ქულა აუღო, მეორე სეტში კი 7:3 იძალა. მარსაგიშვილი მეოთხედფინალში შეხვდება პუერტორიკოელ ხაიმე იუსუპ ეპინალს.

მძიმე წონით კატეგორიაში (+120) დავით მოძმანაშვილმა ძალზე იოლად აჯობა მექსიკელ ხესე რუის ფლორესს – პირველ სეტში 4 ქულა აუღო, მეორეში კი ერთბაშად 7 და ვადამდე დაასრულა შეხვედრა. შემდეგ წრეში იგი რუმინელ და ყაზახ მოწინააღმდეგეებს შორის გამარჯვებულს დაუპირისპირდება.

internet.ge