20 წლის ზურაბ ჟვანიამ გამარჯვებით აღნიშნა თავისი დებიუტი ევროპის უძლიერეს სარაგბო ლიგაში, საფრანგეთის “ტოპ 14”ში - 2012/13 წლების სეზონის პირველ ტურში მისმა “სტად ფრანსემ” ქართველთა “მონპელიე” შინ დაამარცხა 32:16.

შეხვედრას ინტრიგას ისიც ჰმატებდა, რომ პირველ ნომერზე მოთამაშე ბურჯი ჟვანია თავისი თანამემამულის, მონპელიელთა მარჯვენა ბურჯის გიორგი ჟღენტის წინააღმდეგ იდგა. მამუკა გორგოძეს ტრავმის გამო არ უთამაშია - საქართველოს საუკეთესო მორაგბე ამჟამად აღდგენით კურსს გადის და თუ ყველაფერი კარგად წავიდა, მალე დაუბრუნდება მოედანს.

დათო ზირაქაშვილის “კლერმონ ოვერნმა” გასვლაზე ბასკეთში მძიმე გამარჯვება მოიპოვა “ბაიონასთან” 13:6 და საქართველოს ნაკრების ერთ-ერთი ლიდერი მეორე ტაიმში შევიდა შეცვლაზე. ასევე მეორე ნახევარში გამოჩნდა მოედანზე “ტულონის” რაზმში “ბორჯღალოსანთა” ბურჯი დავით ქუბრიაშვილი, რომლის გუნდმაც კატალუნიაში “პერპინიანი” წააქცია 21:15.

ქართველების გარეშე ჩაიარა ტურის ცენტრალურმა შეტაკებამ “ტულუზა”-“კასტრი” 23:22. ამის მიზეზი ტრავმებია. ტულუზელ ჯაბა ბრეგვაძესა და ვასილ კაკოვინს სხვადასხვა სიმძიმის დაზიანებები აქვთ, ასევე დაშავებულია კასტრელი ანტონ ფეიქრიშვილი.

Internet.ge