Facebook-ში მალე ახალი განყოფილება გაიხსნება, სახელწოდებით App Center. მისი საშუალებით შესაძლებელი იქნება მაღალი ხარისხის პროგრამების გადმოწერა სოციალური ქსელისთვის.

App Center ძალიან ახლოს ინქება მობილურ ონლაინ პროგრამებთან Google Play-სა და App Store-სთან: გამომგონებლებს შეეძლებათ საკუთარი პროდუქციის ონლაინში განთავსება, მომხმარებლებს კი - მათი გადმოწერა. ახალი „მაღაზიის“ სტუმრობა მობილური ინტერნეტითაც იქნება შესაძლებელი. გვერდზე განთავსდება როგორც ფასიანი, ისე უფასო პროდუქცია.

„Facebook-ის 900 მილიონზე მეტი მომხმარებლისთვის App Center გახდება ახალი, ძირითადი ადგილი ისეთი პროგრამების მოსაძიებლად, როგორებიცაა Draw Something, Pinterest, Spotify, Battle Pirates, Viddy და Bubble With Saga,“ - საკუთარი ბლოგიდან ამცნო მომხმარებლებს სოციალური ქსელის წარმომადგენელმა აარონ ბრეიდიმ.

მთავარ აქცენტს App Center-ის შემქმნელები პროგრამების ხარისხზე აკეთებენ. ბრეიდის თქმით, მომხმარებლებს მარტივად შეეძლებათ კატალოგიდან პოპულარული პროგრამის არჩევა, საკუთარი კომპიუტერის მონაცემებთან შედარება და შესაბამისი ლინკიდან მისი გადმოწერა.

Facebook-ის წარმომადგენლები აღნიშნული სერვისის გამოშვებას უახლოეს კვირებში გეგმავენ.

Internet.ge