ატომური კვლევების ევროპული ცენტრის მეცნიერები ირწმუნებიან, რომ ჰიგსის ბოზონი აღმოაჩინეს. ჰიგსის ბოზონი ჰიპოთეტური ნაწილაკია, რომელიც მატერიას მასას აძლევს. მეცნიერები მას 45 წელია ეძებენ და ამისთვის ათ მილიარდამდე დოლარიც დახარჯეს.

ცენტრის აღმოჩენა ფიზიკას ახალ საფეხურზე ასვლას ჰპირდება. ფიზიკის ელემენტარული ნაწილაკების თეორიაში, რომელიც სტანდარტული მოდელის სახელით არის ცნობილი, ჰიგსის ბოზონის აღმოჩენა ის უმაღლესი მწვერვალი იქნება, რომელიც სტანდარტული მოდელის სისწორეს დაამტკიცებს.

„ჰიგსის ბოზონი გვჭირდება იმის ასახსნელად, თუ რა არის მასა. მაგრამ სინამდვილეში ჩვენ იგი იმისთვისაც გვჭირდება, რომ ავხსნათ სამყარო - თუ ნაწილაკებს მასა არ ექნებოდათ, არ იქნებოდნენ ვარსკვლავები, გალაქტიკები და ატომებიც კი. ჰიგსის ბოზონის აღმოჩენა დაამტკიცებს, რომ ჩვენ ვიყენებთ სწორ მეთოდს სამყაროს ასახსნელად,“ - განუცხადა BBC-ის ელემენტარული ნაწილაკების ფიზიკოსმა ტარა შირსმა.

აღმოჩენაში საბოლოოდ დასარწმუნებლად მეცნიერები დამატებით მონაცემებს მოიპოვებენ და მათ საფუძვლიან ანალიზს მოახდენენ. თუ შედეგები ამის შემდეგაც ძალაში დარჩება, მაშინ ეს იქნება საუკუნის ყველაზე მნიშვნელოვანი სამეცნიერო აღმოჩენა.

internet.ge